وحلمك فين؟!!
وكان مصلوب على الجدران
دا كان نفسه يلاقي لعمره بر أمان
ساعات حيران
ساعات ولهان
ومتقطع
ومش عارف يقابل روحه من تاني
تتوه منه ..
وعايزه تروح جسد تاني
دواوينه غرام عمره ..
واشعاره نفس محروم
من احتماﻻت إلى احتماﻻت
وحلم انداس ورا الحكايات
عطش فرقة ومروية
دموع وآهات
دموع معجونة بابتسامات
رياح جايه مدويه ومش دريان
بتصرخ في أنين روحه ..
أنا العطشان
وم القسوة وم اللهفة
وريد هربان..
في سكة خوف
وخط موازي للأحلام .
وان اتلاقوا ...!!
يفوت الفرع ف النخلة
يكسر طرحها المزعوم
وطول عمره بيتحايل
في وسط هموم
بيغزل شعره م الفرقة ..
لهيب مكتوم
يلاقي رصيده ف اﻵخر..
صكوك غفران
ويدخل بحر م اﻷحزان
وموجة تسلمه لموجة
بلا شطآن
بيتطمن ..
- لكن هيهات -
ويفصل همه م الفرحة
يلاقي فرحته أناااات
ما يطلقهاش
حابسها في جدار روحه
كانت غرقانه م اﻷول
بحور وبحور من الحرمان
من اﻷحزان ..من اﻷوزان
ومهما ان كان..
تحس انك قوي و ضعيف
ومش غلبان
شرب قلبك بحور الشعر م الوجدان
بتنزف إنت أنفاسك
ومش خايف يشدك موت
- دا حتى الموت بقى خايف -
يضيع عمرك وﻻ عرفتش وﻻ حاجة
عن امبارح
عن اﻵتي
عن الشطآن .
وآآآخر نبض في حبك وقف حيران
وتاني الدمع يتحايل لنن العين
يفيض ويفيض يا نبض القلب والتنهيد
وسجن الروح ..
دا باب مفتوح
وقف سجان على بابه
وفيين واقف ؟؟
دا إنت خلاص ومش شايف غير التعذيب
وعمر طويل بيتعذب
ووسط النار واقف تضحك
من اﻹحساس .. كأنه عبير من اﻷشواق
ﻻ مرة يضيع
وتبقى ساعتها تستاهل
يموت حلمك على الجدران .
